TIJORAT BANKLARIDA TRANSFORMATSIYA ORQALI FAOLIYAT SAMARADORLIGINI OSHIRISH YO‘LLARI (“O‘ZMILLIYBANK” AJ MISOLIDA)

Abstract

Kirish. Zamonaviy iqtisodiy muhitda tijorat banklari global raqobat, texnologik yangilanishlar va mijozlarning o‘zgaruvchan talablari sharoitida faoliyat yuritmoqda. Ushbu murakkab sharoitlarda bank tizimining barqarorligini ta’minlash, moliyaviy xizmatlar sifatini oshirish va iqtisodiyotni qo‘llab-quvvatlash uchun transformatsiya jarayonlari muhim ahamiyat kasb etmoqda. Transformatsiya nafaqat ichki jarayonlarni takomillashtirish, balki xizmat ko‘rsatishning yangi usullarini joriy etish va bankning bozordagi mavqeini mustahkamlash imkonini beradi. Ayniqsa, O‘zbekiston kabi rivojlanayotgan iqtisodiyotga ega mamlakatlarda bank sektorining modernizatsiyasi nafaqat moliyaviy institutlarning o‘ziga, balki umumiy iqtisodiy rivojlanishga ham ijobiy ta’sir ko‘rsatadi.

“O‘zmilliybank” aksiyadorlik jamiyati misolida transformatsiya jarayonlari bank faoliyatida samaradorlikni oshirishning real imkoniyatlarini ko‘rsatmoqda. So‘nggi yillarda ushbu bank tomonidan amalga oshirilgan strategik o‘zgarishlar, xususan, raqamli texnologiyalarni joriy etish, xalqaro moliya bozorlariga chiqish va mijozlar bilan ishlashda innovatsion yondashuvlarni qo‘llash bankning nafaqat moliyaviy ko‘rsatkichlarini yaxshiladi, balki uning iqtisodiyotdagi rolini ham mustahkamladi. Shu bilan birga, transformatsiya jarayonlari banklar oldida yangi chaqiriqlar – masalan, xarajatlarni optimallashtirish, xodimlar malakasini oshirish va raqobat muhitiga moslashish kabi vazifalarni ham qo‘ymoqda.